Laugardaginn 29. júlí
Urriðavatnssund fer fram laugardaginn 29. júlí nk. Dagana fyrir sund og á sunddaginn sjálfan, vantar okkur sjálfboðaliða í ýmis verk.
Hafir þú tíma og áhuga, hafðu samband með tölvupósti á netfangið
Grein á vertuuti.is
Urriðavatnið er örlítill pollur
engu það líkt er að Þingvallavatni
En í því er sundsprettur helvíti hollur
Og held ég að öllum þar sveimér þá batni.
Fyrir tveimur árum síðan þreytti ég mitt fyrsta Urriðavatnssund. Ég af hæversku minni og landsþekktu lítillæti skráði mig í 500 metra skemmtisund ásamt syni mínum. Þetta sagðist ég auðvitað einvörðungu vera að gera fyrir mitt eigið sjálf og syndaaflausnir en gáfaðir menn og gírugar konur hafa vitað lengra en nef þeirra náði og séð að þetta var lítið annað en hræódýr og afar mistæk kosningakrúttmennska. Það er nefnilega þíður og þjóðlegur siður að ríða um héruð og herskarast herfilega korter í kosningar og þykjast hafa á öllu og engu áhuga til þess eins að svæla út sóðaleg atkvæði fyrir eigið fé og frama. Ég skyldi nú síst verða eftirbátur í þeim æsispennandi leik.
Ekki var skrokkurinn vel stemmdur né stinnur. Það þrátt fyrir geypilegar hugrænar atferlismeðferðir mínar í átt að slíkum búsmabúk. Því brá ég á það ráð að best væri að æfa svolítið fyrir sundið. Maður er nú ekki alvitlaus þó útlitið gefi ástæðu til að ætla annað. Ég dreif mig því í Sundlaug Egilsstaða daginn fyrir keppni og kannaði hvort ég kæmist téða fimmhundruð metra án þess að æla eða andast. Skemmst er frá því að segja að ég lak í lokametrana án lóðsara undir vökulu auga sundlaugarSteina. Ef hann hefði verið betur stemmdur hefði hann veitt mér orðu á staðnum. (Óstaðkunnugir vita víst ekki hver Steini í sundlauginni er og það þýðir ekkert að útskýra það frekar fyrir þesslegum jaðarhópum samfélagsins).
Þá brast á með keppnisdeginum sjálfum. Hróðug mætti ég með mikilmennskuglott og gífuryrtar yfirlýsingar um eigið ágæti. Þetta gerði ég nátturlega einvörðungu til að fela hæversku mína og hóflegt sjálfsálit. Eftir að hafa tölt einn hring og talið mér trú um töluverðan atkvæðafjölda tiplaði ég inn í tjald og tróð mér íþróttagallann. Hvað svo sem öllu líður þá get ég uppljóstrað því strax hér í frásögninni að stærsti sigurvegari dagsins voru svo sannarlega saumarnir á sundbolnum.
Líkt og Linda Pé hér forðum daga gekk ég geislandi og glæsileg út úr típíinu af svo miklum þokka að sundafatamódel hinnar háleynilegu Viktoríu hefðu bliknað og blánað í samanburðinum.
En nú fór að bera á barmabrestum. Gamla pumpan prumpaði og skalf þegar óðar dró að sundinu sjálfu. Ég ásamt glæstum hópi hreystimenna, stórum og stæðilegum, á grunnskólaaldri, gerðum okkur klár til að hefja hundasundið. Það var varla fyrr búið að hleypa úr fallbyssu Þórunnar Hyrnu Hálfdánardóttur en frá mér hrutu harmakvein æðimikil þar eð ég hélt síst í við háfætta unglingana sem skunduðu skammlaust í vatnið og hófu fimlega baráttu sína við bolaöldurnar. Ég skakklappaðist heldur ókræsilega út í dauðahafið og hóf mig til hins síðasta sunds. Fljótlega fór að bera á ýmsum vanhuguðum undirbúningsatriðum. Steina í sundlauginni hafði algerlega fyrirborist að berja á mig öldum og illviðri. Þó ég sé ekki þekkt fyrir að færa nokkuð í stílinn né stóryrða, þá get ég upplýst ykkur um það að yfir vatnið gekk urr nokkurt ógurlegt og óskapnaðsveður af slíkum ofsa að aldrei hefur nokkur bur séð slíkt áður. Það var því með ólíkindum að ég skyldi hafa mig fyrir baujuna langþráðu sem markaði helming hremminga þeirra sem ég hafði sjálf komið mér í. Undrandi bæði yfir einstökum árangri mínum og því að ekkert hefði lækkað í vatninu þrátt fyrir að hafa innbyrt það sennilega til hálfs, mundi ég eftir að Örn í Húsey hafði víst eitt sinn kennt mér Arkímedesarregluna. Það var þá sem ég undraðist yfir því að ekki hefði verið gefin út flóðaviðvörun bæði að Skógargerði og upp í Fjallsel þegar ég steig út í. Nú eygði ég endamarkið, glæstar móttökur, næsta öruggt sæti á hinu háheilaga alþingi og með því drambfulla daga í borg munaðar og menningar. Þvílíkar framtíðarhorfur hafði enginn áður haft. Aldrei!
Það bar til um þessar mundir að senn skildi skrásetja stórkostlegan árangur minn á sviði íþróttaafreka. Ég hugsaði heitt til Árna Óla og allra ótrúlegustu upplognu afsakananna sem ég færði honum blygðunarlaust á færibandi alla mína örstuttu menntaskólatíð. Hann skildi sjálfsagt fyrstur hringja og árna mér heilla fyrir framann!
En líkt og Fönix fuglinn sjálfur synti ég of nálægt frægðarsólinni og vissi því ekki fyrr en að mér var dröslað upp á varnargarðinn, belgblárri og bumbulli. Þar höfðu staðið á garginu mínir helstu aðdáendur og hvatningarmenn, mætishjónin og frændfólk mitt á Urriðavatni. (Bænum altso. Þessi grein er bara heilt yfir ekki skrifuð með aðkomufólk í huga. Ég sé það núna. Ég biðst einnig afsökunar á að hafa kynnt inn karakterana Árna Óla og Örn í Húsey en allt á þetta fólk það sameiginlegt að hafa dregið það stutta strá í lífinu að þurfa að lexía mér á einn eða annan hátt).
Af vesalings heimilisfólkinu á Urriðavatni er það að frétta að síðan þau þurftu að draga hvalrekann og kvíðasjúklinginn upp á þurrt land hafa þau varla borið barr sitt. Þeirra er samt sennilega getið í þrekvirkjabókum samhliða þorskastríðinu og björgun Keikós.
Sneypt og snauð silaðist ég eftir varnargarðinum og samdi í hausnum stóryrta ræðu um ótækar aðstæður og manndrápsleiðangur. En þar sem heilinn er sæmilega á pari við hollninguna var lesningin horfin úr huga mér áður en ég gekk síðasta spölinn og mér mætti glæstur hópur gleiðbrosandi gleðifólks sem lét eins og ég hefði heiminn sigrað.
Það þarf sennilega ekki að taka það fram að ég komst ekki á þing.
Sé ykkur öll eldspræk á glæstu tíunda Urriðavatnssundi í sumar.
Hrafndís Bára Einarsdóttir.
VERTU MEÐ í margföldu afmælissundi 29. júlí 2023 Urriðavatnssundið 29. Júlí nk. verður afmælissund í mörgum skilningi. Þá verða liðin tíu ár frá fyrsta opinbera sundinu í júlí 2013 og þá verður líka slíkt sund þreytt í tíunda sinn því ekki var synt 2021 vegna Covid-19. Þessi tíu-tvenna er ekki það eina því við munum líka halda upp á þrettán ára afmæli, þar sem heimamaðurinn Eiríkur Stefán Einarsson synti Urriðavatnssundið árin 2010, 2011 og 2012, já og raunar Covid-árið 2021 líka, svo fjórtán ára afmælinu verður ekki sleppt. Við viljum gera þetta að stórum viðburði og vonumst til að sjá ykkur sem allra flest. Kannski munum við líka í takt við tímann hætta að tala um sundmenn og sundfólk og tala bara um syndara. Vatnið bíður, vertu með 29.07. 2023, hlökkum til að sjá þig !
Skipuleggjendur Urriðavatnssunds
Langar ykkur að taka þátt í skemmtilegum íþróttaviðburði og prófa eitthvað nýtt? Ef svo þá hvet ég ykkur til að taka þátt í Urriðavatnssundinu sem haldið er ár hvert í Urriðavatni nálægt Egilsstöðum. Öll umgjörðin í kringum sundið er til fyrirmyndar og vel staðið að öllum öryggismálum. Hægt er að velja um 3 vegalengdir þannig að öll geta fundið eitthvað við sitt hæfi. Ég hef bæði synt í spegilsléttu vatninu og í vindi og öldugangi en upplifunin er alltaf jafn stórkostleg að loknu sundi.
Ég hvet öll til að skrá sig og taka þátt. Þið sjáið ekki eftir því.
Sumurin 2011 og 2012 synti ég svokallað Vansbrosund í Svíþjóð. Það er 3 km langt, fyrst 2 km. niður hina lygnu Dalelven og svo 1 km upp þverá hennar, Vanån. Ég heillaðist af vatninu, hvetjandi áhorfendum, fólki í bátum sem gætti okkar sundfólksins og allri umgjörð sundsins. Í fyrra skiptið dagdreymdi mig um að stofna til svona sunds heima á Héraði. Í seinna skiptið vissi ég á mótum ánna tveggja að slíkt sund ætti að vera í Urriðavatni. Þegar heim kom setti ég mig í samband við Guðmund Davíðsson yfirmann Hitaveitu Egilsstaða og Fella (HEF) og þau Steinunni Ingimarsdóttur og Kjartan Benediktsson í björgunarsveitinni Hérað sem leist vel á hugmyndina. Ég ræddi við landeigendur á Urriðavatni sem tóku hugmyndinni vel og í ljós kom að Urriðavatnssund var í raun þegar til. Eiríkur Stefán Einarsson frá Urriðavatni hafði þá þegar synt vatnið endilangt og hugðist gera að venju. Það voru öðru fremur velvilji landeigenda og Eiríks Stefáns ásamt með tilstyrk HEF og björgunarsveitarinnar Héraðs sem gerðu fyrsta opinbera Urriðavatnssundið að veruleika 27.júlí 2013 og síðan verið árlega nema hvað það féll niður sumarið 2021 vegna Covid.
Pétur Heimisson
Mynd: Hilmar Gunnlaugsson og Pétur Heimisson
Tími:  |
Egilsstaðir - Tjarnarbraut: | ||||||
Hitastig:  |
|
°C |
Urridavatn: Yfirborð: | ||||||
Hitastig:  |
|
°C |
Þátttökugjöld:
Ekki verður hægt að greiða með korti í ár en millifærslur og bankakröfur notaðar eftir því sem við á.
Í svarpósti frá netskraning.is á að koma fram kennitala og bankareikningur, þannig að auðvelt á að vera að millifæra greiðsluna
Skráning er ekki gild fyrr en greiðsla hefur borist.